Gin-athag sang Punong Barangay sang Bakhaw, Mandurriao, Iloilo City nga wala sang record sa ila lugar ang subject nga nakuhaan sang kapin P3 million nga shabu sa buy bust operation.
Ang arestado amo si Ronaldo Pedrosa, residente sang Bolilao, Mandurriao, Iloilo City kag nagarenta lang sang kwarto sa isa ka boardinghouse sa Bakhaw.
Sa interview sang Bombo Radyo kay Punong Barangay Joel Alvarado sang Bakhaw, Mandurriao, iya ginpahayag nga nagabalik-balik lang si Pedrosa sa lugar apang wala sila sang ihibalo nga involved ini sa iligal nga aktibidad.
Suno kay Alvarado, plano naman nila nga mas hugton pa ang pagbantay sa mga boardinghouses agud ma-monitor ang mga boarders.
Matandaan nga magluwas sa druga, nakuhaan man ini sang 38 caliber nga armas.
Sa subong, preso na ini kag nagapangatubang sang kaso nga paglapas sa Republic Act No. 9165 ukon Comprehensive Dangerous Drugs Act of 2002.
