Arestado sa drug buy bust operation ang isa ka durugista sa Jaro Plaza sa distrito sang Jaro, Iloilo City.
Ang subject amo si Victor Roy Agudo, residente sang Barangay East Baluarte, Molo, Iloilo City.
Sa interview sang Bombo Radyo sa team leader sang Station Drug Enforcement Team (SDET) sang Jaro Police Station, iya ginpahayag nga naglab-ot sa duha ka semana ang ila pagmonitor sa subject.
Narekober kay Agudo ang isa ka sachet sang suspected shabu bilang buy bust item kag buy bust money nga nagabalor sang P1,100.
Matapos nga ginrikisa ang subject, dugang nga narekober ang walo pa ka sachet sang suspected shabu.
Ginpahayag man sang subject nga ginakuha sini ang iya ginabaligya nga mga iligal nga droga halin sa iya kakilala sa sulod sang Bureau of Jail Management and Penology (BJMP) sa Ungka, Jaro, Iloilo City.
Sa subong, yara sa kustodiya sang Jaro Police Station ang arestado kag nagapangatubang sa kaso nga paglapas sa RA 9165 ukon ang Comprehensive Dangerous Drugs Act of 2002.
