Ginpahayag sang International Olympic Committee (IOC) nga isa ka isolated case ang natabo sa isa ka Dutch reporter nga gin-interrupt sang mga security officials kag ginpapalayo apisar nga naga-live broadcast ini para sa Winter Olympics sa Beijing, China.
Suno sa IOC, indi sini maapektuhan ang trabaho sang iban nga media personnel nga yara sa Beijing Games. Ang journalist nga involved sa insidente amo si Sjoerd den Daas.
Naga-deliver ini sang live report sa public broadcaster nga NOS sang ginpatigayon ang opening ceremony sa Beijing apang gulpi ini nga ginpalibutan sang Chinese security officials kag ginpwersa nga palayuon sa iya nga ginatindugan.
May isa pa ka security officer nga nag-attempt pa nga mag-uyat sa iya kamot sa mismo atubang sang camera samtang nag-attempt man ang reporter nga magpadayon sa paghambal.
Makit-an naman nga confused ang studio anchor sa Netherlands kun ano na ang nagakatabo sa venue.
Suno sa paathag sang IOC, nagapakig-angot na sila sa state broadcaster sang Netherlands kag gintawag man ini sang committee nga isa ka unfortunate circumstance.
Ginpahayag naman sang involved nga broadcaster nga indi ini ang first time nga natabo ini sa iya. Ginapahayag nga naka-ekperyensya man ang iban nga media team nga ginpa-untat sang pulis samtang naga-report sila may kaangtanan sa Olympics.
Nahibaluan nga limitado lang sa “closed loop” ang tanan nga participants sa Winter Games– lakip na ang media — para sa bilog nga duration sang hampang. ##
