Nag-utang ang Pilipinas sa World Bank sang masobra $7.5 billion ukon P392.2 billion agud pondohan ang pandemic response sang gobyerno.
Suno kay Department of Finance Secretary Carlos Dominguez, kinahanglan sang Pilipinas nga mag-utang sa multilateral bank agud pondohan ang pagbakal sang COVID-19 vaccines.
Sa subong, nakabaton na ang Pilipinas sang masobra $7.53 billion ukon P393.6 billion nga balor sang financing santo sa 22 ka mga kasugtanan sa Washington-based World Bank.
Kun pahat-pahaton suno kay Dominguez, 15 sa sini nga mga kasugtanan ang napanginpuslan na.
Ang ini nga utang ang nagadangat tanan sa $6.15 billion ukon P321.4 billion sa diin ini ang gingasto sang yara pa sa tunga-tunga sang COVID-19 lockdowns.
Ginpahayag sang tiglikom nga ang trilateral policy, nga ginsudlan sang Pilipinas sa World Bank, Asian Development Bank kag Asian Infrastructure Investment Bank agud pondohan ang response sang gobyerno sa COVID-19 ang pamatuod nga makabulig agud indi magtibusok ang ekonomiya sang pungsod.
Ginpanugyan man ni Dominguez nga ang trilateral mechanism ang mahimo man nga i-adopt sang multilateral institutions agud mapondohan ang mga proyekto sa climate-risk countries.
Una na nga nagpaandam ang ahensya nga kinahanglan sang masunod nga administrasyon nga magsupot agud mabayaran ang utang sang Pilipinas nga gingasto sang pandemya.
Posible nga magalawig sang apat ka dekada ukon 40 ka tuig antes mabayaran sang gobyerno ang mga gin-utang sang Duterte administration sang pandemya.
