ILOILO CITY – Nagalaom ang Duterte Administration nga untatan na ni Vice President Leni Robredo ang pagpakamalaot sa drug war campaign sang gobyerno.
Ini matapos nga ginbaton na ni Robrero ang imbitasyon ni Presidente Rodrigo Duterte nga mangin co-chair sang Inter-Agency Committee on Anti-illegal Drugs (ICAD).
Nahibaluan nga nag ugat ang pagtanyag ni Duterte kay Robredo nga mangin drug czar matapos ang paghatag sini sang kritisismo sa nagakatabo nga anti-drug campaign sang administrasyon sa diin madamo ang nagakalamatay nga mga drug personalities.
Sa exclusive interview sang Bombo Radyo Iloilo kay Assistant Secretary Anthony Gerard “Jonji” Gonzales, sang Office of the Presidential Assistant for the Visayas (OPAV), iya ginpahayag nga tubtub sa katapusan sang termino ni Robredo siya na ang mangin drug czar.
Suno kay Gonzales, madamo sang mga ginapabuy-an nga pahayag si Robredo batok kay Duterte ilabi na sa pamaagi sini sa pagpapassang iligal nga droga sa diin wala man ini sang una sang may ginahimo agud matapna ang nasambit nga problema.
Apang bilang ikaduha nga pinakamataas nga opisyal sang gobyerno, ginpahayag ni Gonzales nga dapat indi lang magpakamalaot si Robredo sa baylo magbulig ini sa Duterte administration.
Sa subong nga co-chair sang Inter-Agency Committee on Anti-illegal Drugs (ICAD) si Robredo, diri matakos ang iya ikasarang sa pagtapna sang iligal nga droga sa Pilipinas.
Samtang, gin ako man ni Gonzales nga sa subong madamo pa sang dapat himuon nga tikang agud dalayon nga mauntat ang iligal nga droga sa pungsod.
Lakip sa mga gintumod nga rason sang natungdan nga upang agud mangin madinalag-on ang drug campaign amo ang pasaway nga mga law enforcers kaangay sang Philippine National Police, mga kurap nga public officials kag problema sa pamilya sa diin masami nga nagagamit sang iligal nga droga ang mga problemado nga mga kabataan.
Sa pihak sini, ginpasalig sang Duterte administration nga ginatunguhaan nila nga matapna ang problema sa iligal nga droga pinaagi sa pagbuligay sang presidente kag bise presidente.
