Indi magpadala ang Kamara sang subpoena ukon imbitasyon kanday former president Rodrigo Duterte kag anay Philippine National Police (PNP) chief kag subong Sen. Ronald “Bato” dela Rosa samtang ginapatigayon ang inquiry kaangot sa extrajudicial killings sa war on drugs sa nagligad nga administrasyon.
Apang suno kay Manila 6th District Rep. Bienvenido Abante, chairman sang committee on human rights sa House of Representatives, bukas ang panel pananglitan gusto sang duha nga magtambong sa imbestigasyon.
Suno kay Abante, ginahatagan niya sang respeto ang anay chief executive, samtang may yara naman sang inter-parliamentary courtesy kay Dela Rosa bilang myembro naman sang Senado.
“I would like to give full respect to the former president. Although he might not be exempt from this investigation, yet I think we should give full respect to the former president being a public official also. So we’re going to inform the former president on this,” pahayag sini. “What I can promise is that we will be informing again Senator Dela Rosa on the next hearing, and if he would like to attend, then he can. We will tell him that if you would like to come, you are welcome.”
Gina-insister naman sang Ilonggo congressman kag Kabataan party-list Rep. Raoul Manuel nga dapat yara sanday Duterte kag Dela Rosa sa House probe agud nga maathag ang lain-lain nga reports sang PNP kaangot sa “Oplan Tokhang” kag “Oplan Double Barrel.”
Pahayag ni Manuel, may mga pamangkot sa anti-drug war nga ang former president kag ang iya PNP chief lamang ang makasabat.
Matandaan nga sa atubang sang mga mamalidha sang Myerkules, ginpahayag sang human rights lawyer nga si Atty. Jose Manuel Diokno nga 20,322 drug suspects ang napatay sa idalom sang administrasyon ni Duterte sandig sa record sang Office of the President. Masobra sa tatlo ka pilo ini nga mas daku nga numero ipaanggid sa 6,200 official count nga ginpaguwa sang PNP.
