Nagplastar na sang timeline ang Pre-Trial Chamber I sang International Criminal Court (ICC) agud makapasa sang mga ebidensya ang prosecution kag ang kampo ni former President Rodrigo Roa Duterte.
Sa order nga napetsahan sang Marso 21, ginsiling sang chamber nga dapat nga ipahibalo sang prosecution kag defense kun ano ka damo kag kun ano nga mga ebidensya ang ila ginaplano nga ipresentar.
Sa Abril 4, dapat nga napasa na sang prosecution ang information sa kabug-usan nga numero sang nakasulat nga mga ebidensya, kun tuyo bala nila nga maggamit sang iban nga non-written nga documentary evidence, kag kun pila ka mga testigo kag witness statements ang ila nga ihatag.
Ginmanduan man ang prosecution nga magpresentar kun paano ini mag-request sang protective measures para sa potential witnesses, kun magapadayon ini sa imbestigasyon kay Duterte, kag kun paano sini maapektuhan ang disclosure process.
Para naman sa defense, ginhatagan ang kampo sang tubtub sa Abril 11 agud nga magpasa sang ila nga obserbasyon sa information nga i-sumite sang prosecution.
Sabton man nila kun magapresentar sila sang ebidensya kag magapatawag bala sila sang kaugalingon nga witnesses kadungan sang confirmation hearing.
Kaangot naman sa partisipasyon sang mga biktima, naghatag ang ICC sang tubtub April 2, 2025 agud maka-file sang observations kaangot sa applications for participation sang mga biktima lakip na ang admission process, ang proof of identity documents, kag ang legal representation sa proceedings.
Ang duha ka kampo ang hatagan naman sang tubtub sa April 11, 2025 agud nga makasabat.
Una na nga gin-anunsyo sang Pre-Trial Chamber presiding judge nga gin-schedule sini sa Septyembre 23, 2025 ang confirmation of charges kay Duterte sa ginapangatubang sini nga kaso nga crimes against humanity nga nag-ugat sa kontrobersyal sini nga drug war campaign.
Marso 11 sang gindakop ang former president sang nag-abot ini sa NAIA halin sa Hong Kong.#
