Balantayan kun matabo subong nga adlaw ang face-off nanday former president Rodrigo Duterte kag ang pinakamatunog nga kritiko sang iya anay administrasyon nga si former senator Leila de Lima.
Pareho nga nagkumpirma ang duha sang ila attendance sa labing-una nga hearing sang Senate Blue Ribbon committee subong nga adlaw, Oktubre 28, nga naangot sa mga kontrobersiya sang ginpatuman ang war on drugs.
Ini nga inquiry sa Senado ang pangunahan ni Senate Minority Leader Aquilino Pimentel III.
Una na nga ginkumpirma ni anay Philippine National Police (PNP) chief kag subong Sen. Ronald dela Rosa nga magatambong si Duterte bisan sin-o pa ang magapanguna sa imbestigasyon sang Senado.
Sa pihak nga bahin, may media advisory man nga ginpaguwa ang Mamamayang Liberal (ML) party-list kun sa diin first nominee si De Lima. Ginkumpirma sa amo nga advisory ang attendance sang former senator nga amo man anay ang chairperson sang Commission on Human Rights (CHR).
Si De Lima ang gin-aresto kag ginpreso sang malapit pito ka tuig sa idalom sang liderato ni Duterte bangud sang mga alegasyon sa illegal drug activities, apang sini lamang nga 2024, na-clear na gid man ang pangalan sini sa tanan nga drug cases batok sa iya.
Magluwas sa ila, gin-imbitar man sa hearing sang Senado subong nga adlaw si former Iloilo City Mayor Jed Patrick Mabilog nga isa anay sa ginbutang sa drug watchlist ni Duterte kag ginpahog nga patyon rason nga nagpuyo ini sa Estados Unidos sang Amerika sa sulod sang malawig nga tion.
Ginalauman man nga magatambong subong nga adlaw ang anay paborito nga pulis ni Duterte nga si retired Police Colonel Royina Garma nga amo ang isa sa may pinakadamo nga ginkanta sa quad committee sa Kamara kaangot sa drug war kag sa ginaalegar nga rewards system sa mga pulis nga makapatay sa drug suspects.
Sa advisory sang Senate Blue Ribbon Committee, nakasaad ang mga tuyo sang imbestigasyon kaangay sang pagtumod kun ano ang primary goals sang Duterte drug war, kun paano ginpatuman ang kampanya, kun paano ginhim ang Oplan Tokhang, kag hibaluon man kun ngaa nangin kontrobersyal ang amo nga kampanya.
Sa isyu sang human rights, iga-establisar kun ngaa madamo ang alegasyon sang extrajudicial killings sa drug war, kun paano sini naapektuhan ang pigado nga mga komunidad, kag ngaa nahimo ini nga social justice sa tunga sang legal kag ethical concerns nga nag-ugat sa ginaalegar kakulang sang due process.
Nahibaluan nga sa report sang Philippine National Police sang May 2022, may 6,200 individuals nga napatay sa anti-drug operations apang base sa human rights organizations kaangay sang Human Rights Watch, malapit 12,000 ang napatay sa amo nga kampanya.#
