Pormal na nga gin-imbitar sang quad committee si former President Rodrigo Duterte agud magtambong sa hearing 9:30 buwas sa aga, Oktubre 22, kaangot sa ginaalegar extrajudicial killings sang ginpatuman ang war on drugs.
Ginsulat ang imbitasyon sang Oktubre 18 kag pirmado ni Surigao del Norte 2nd District Rep. Robert Ace Barbers nga amo ang overall chairman sang quad comm sa Kamara.
Ginsiling sa sulat nga imbitado si Duterte agud maghatag sang kasanagan sa mga isyu nga gina-istoryahan particular ang extra-judicial killings.
“The Joint Committee respectfully invites you to attend the said inquiry to provide valuable insights and shed light on the issues under discussion particularly on extra-judicial killings,” pahayag sa imbitasyon.
Ginhingyo man kay Duterte nga ikumpirma ang iya attendance para ma-facilate ang arrangement sa partisipasyon sini. Ginsilingan man ini nga magpasa sang Committee Secretariat kun may yara siya sang presentation, dokumento, ukon opening statement.
Sa separado nga sulat halin sa lead committee nga Committee on Dangerous Drugs, ginmanduan man si Criminal Investigation and Detection Group (CIDG) Director Polive Brigadier General Nicolas Torre III nga siguruhon nga madul-ong ang imbitasyon sa balay ni Duterte sa Davao City.
Kilala si Torre nga amo ang maisog nga nagpanguna sa pagsulod sa compound sang Kingdom of Jesus Christ (KOJC) agud pangitaon ang suod nga abyan ni Duterte nga si Pastor Apollo Quiboloy.
Wala pa subong sang opisyal nga kumpirmasyon halin kay Duterte kun makadto siya ukon indi.
Sa bahin ni Barbers, ginsiling sini nga bisan ano ang sabat ni Duterte, respetuhon man ini sang quad committee.
Antes ang sulat, nanghangkat naman si Duterte sa quad comm nga siya ang imbitaron kag indi ang bisan sin-o lang bangud sa pagkamatuod, siya man ang gina-istoryahan sa hearings. Ginsiling ni Duterte nga bisan sa Senado ukon sa Kamara, malipayon siya kun ma-imbitaran siya sa imbestigasyon sa drug war.
Ang quad comm amo ang apat ka House committees nga ginabug-usan sang dangerous drugs, public order and safety, human rights kag public accounts.
Diri na-implicate si Duterte sa ginaalegar pagpamatay sa tatlo ka Chinese drug lords sa Davao Prison and Penal Farm sang Agusto 2016. Mismo ang former warden kag ang hitman ang nag-ako sini, apang ginpanginwala ini sang kampo sang former president kag gintawag nga political attacks.
Paagi man sa quad comm, gin-implicate man si Duterte bangud sa ginaalegar paghatag sini sang rewards sa mga pulis nga makapatay sang drug suspects, apang ginpanginwala man niya ini paagi sa pagsiling nga wala sang matarong nga pulis nga magasulod sa kaangay nga kasugtanan.#
