Dismayado ang kampo ni former President Rodrigo Duterte bangud wala sila ginpahanugutan nga magpresentar sang ila kaugalingon nga medical evidence kaangot sa ginaalegar nila nga pagluya sang kondisyon sang anay presidente.
Ini ang kasunod sa ginpagwa nga deklarasyon sang International Criminal Court (ICC) Pre-Trial Chamber 1 nga dapat mag-atubang si Duterte sa pre-trial proceedings bangud “fit” ini sandig sa ginpatigayon nga assessment sang mga medical expert.
Suno naman kay Atty. Nicholas Kaufman, lead counsel ni Duterte, maga-file sila sang apela kag iga-insister nga wala nahatagan sang due process si Duterte.
“The Defence is disappointed that, contrary to accepted practice, it was denied the opportunity to present its own medical evidence and to question, in court, the contradictory findings of professionals selected by the judges. The Defence will seek leave to appeal this decision and argue that Mr. Duterte was denied due process,” suno sa abogado sang former president.
Nahibaluan nga sa ginpaguwa nga 25 ka pahina nga desisyon, ginbasura sang ICC ang request sang kampo ni Duterte para sa indefinite adjournment sang kaso. Gin-schedule man sang chamber ang pag-umpisa sang confirmation of charges hearing sa Pebrero 23, 2026.
Matandaan nga may panel sang medical experts nga nag-check sa ikaayong lawas sang anay presidente matapos nga gin-alegar sang kampo sini nga malipaton na si Duterte kag indi na makadumdom sang mga hitabo, mga petsa, kag mangin sa iya pamilya.
Una naman nga ginbasura sang korte ang ila request para sa interim release.
Marso 11, 2025 sang gindakop si Duterte kag gindala sa The Hague, Netherlands bangud sa kaso nga nag-ugat sa kontrobersyal sini nga drug war.
