Nanginwala si anay Presidente Rodrigo Duterte nga may kahilabtanan ang national leadership sang Hakbang ng Maisug sa naglapta nga peke nga video kun sa diin ginpakita nga nagagamit sang iligal nga droga si President Ferdinand Marcos, Jr.
Ang amo nga video ang ginpakita sa Maisug convention sa Los Angeles, California sa Estados Unidos sang Amerika, apang suno kay Duterte, wala sang ihibalo ang Maisug organizing committee kaangot diri.
“It was a decision made entirely by the Maisug volunteers in the said two places without the knowledge and imprimatur of the Maisug organizing committee. The members of the Maisug leadership [are] just as surprised as the rest of the country when they saw it for the first time,” pahayag ni Duterte.
Apang gindugang sini nga indi bastante ang simple nga pagpanginwala ni Marcos agud nga ma-address na ang mga espekulasyon nga nagagamit ini sang illegal drugs.
Mas maayo suno sa iya kun magpaidalom na si Marcos sa hair follicle drug test, bangud kun negatibo na ang resulta, diri pa lang kag mapanas na ang mga pagpangduha-duha sang publiko.
“Even the ordinary man on the street knows that the best way to put the issue to rest is for President Marcos to undergo a hair follicle drug test. When undertaken by a credible drug testing center, a negative result would erase all doubts once and for all,” dugang sini.
Una na nga ginpahayag ni Defense Secretary Gilberto Teodoro Jr. nga ang video ang kabahin sang mga tikang sang mga may gusto nga i-destabilize ang administrasyon. Suno kay Teodoro, imbestigaran ini sang Armed Forces of the Philippines, Department of National Defense, kag iban nga government agencies agud nga mapasabat ang mga naghimo kag nagpakita sang video. Nagpanawagan man ini sa mga otoridad sa Estados Unidos nga imbestigaran na ang amo nga isyu.
Nagsabat man ang Department of Information and Communications Technology (DICT) nga “deepfake” ukon digitally created ang amo nga video kag mahimo mapasakaan sang kaso nga cyber libel, slander, kag malicious mischief ang sin-o man nga may kahimuan sini.#
