Ginmanduan ni Presidente Rodrigo Duterte ang Kongreso nga magpamati sa report sang Department of Finance (DOF) may kaangtanan sa Bayanihan Fund agud nga indi makahimo sang hapaw nga alegasyon tuhoy sa pondo nga wala naubos gamit.
Sa ginpatigayon nga special meeting, ginpresenta ni DOF Sec. Carlos Dominguez III sa presidente nga kapin P660 billion sang pondo para sa COVID-19 response ang natigayon na nga marelease.
Ginpamangkot man ni Duterte si Dominguez kun ano ka matuod nga may pondo nga wala nagamit base sa nangin pahayag ni Senate President Vicente Sotto III kag Senator Panfilo Lacson.
Suno kay Dominguez, ang ginatumod sang mga senador nga ‘underspending’ amo ang P6 billion ukon 1 percent sang pangkabug-usan nga pondo para sa COVID-19 response.
Pahayag niya, ginatinguhaan na sang Department of Budget and Management (DBM) kag DOF nga mahibaluan kun ano nga mga ahensya sang gobyerno ang wala nag-ubos gamit sang ila nga pondo bilang response sa COVID-19 pandemic.
Suno naman kay Pres. Duterte, ang kritisismo ang masami yara sa executive department apisar nga 1 percent man lang ang wala naggamit.
Nahibaluan nga ang Bayanihan 2 ang nag-expire na sang Hunyo 30.
