Duterte: ‘I have now accepted my fate, and I realize I could die in prison’

Daku nga tyempo sa closing statement ni Atty. Nicholas Kaufman sa International Criminal Court (ICC) ang iya ginpain agud i-istorya sa bilog nga kalibutan ang kahimtangan ni former President Rodrigo Duterte.

Suno sa iya, nabaton na ni Duterte ang iya nga kapalaran kag pati ang posibilidad nga mapatay na lamang ini sa presuhan.

Suno pa sa defense counsel, nagpahayag ang 80-anyos nga anay presidente nga isa siya ka tampad nga alagad sang mga Pilipino, kag luyag niya nga dumdumon siya sa amo nga kinaiya.

“I was a faithful servant of the people, and that is how I wish to be remembered. I have now accepted my fate, and I realize I could die in prison,” kabahin sang gin-quote ni Kaufman nga ginhambal ni Duterte.

Sandig pa sa ginsugid ni Kaufman, nag-istorya si Duterte nga nahimo na sini ang iya nga katungdanan kag nabilin na ang iya nga legasiya ukon marka.

Dugang ni Kaufman, ginsugo siya ni Duterte: “Go to court and do your job, but I can never help you. I no longer remember much at all, and I can’t comment on people whom I do not know and on statistics that mean nothing to me.”

Gintapos naman ni Kaufman ang iya closing statement sa confirmation hearing paagi sa pagpangabay sa judges nga indi pag-i-confirm ang bisan isa sa mga kaso batok kay Duterte. Gin-apelar sini sa chamber nga tugutan na nga makapauli ang former president sa iya puluy-an sa Davao City.

‘NONE OF THAT WAS RESPONSIVE TO ARGUMENTS’

Antes nagtakop ang confirmation hearing, nagtindog naman si senior trial lawyer Julian Nicholls kag nag-apelar sa judges nga indi na pag-ilakip sa records ang closing statement nga gin-deliver sang defense counsel.

Ang ginapakakas sini sa record amo ang parte sang statement ni Kaufman nga ginpahayag sini nga ginhambal ni Duterte.

“None of that was responsive to arguments, which is what this last 30 minutes were about,” suno sa prosekusyon.

Pahayag pa ni Nicholls, indi dapat mag-testify si Kaufman para kay Duterte, bangud nagpamalibad na gani ini nga magkadto sa korte agud magtambong sa proceedings.

“If he wanted to come here, he didn’t want to come here. He could have come here and talked about what he wanted to, but he chose not to. Mr. Kaufman’s conveying this, he’s been complaining about hearsay all day,” dugang sang senior trial lawyer.

Nagsabat naman si Kaufman nga indi man testimonya ang iya ginhambal, kundi isa lang ka paathag kun ngaa wala nagkadto sa hearing ang former president.

Nahibaluan nga sa pagtakop sang confirmation hearing, may 60 ka adlaw ang judges agud magdesisyon kun ano ang himuon kasunod sang mga argumento kag presentasyon sang defense, prosecution, kag common legal representatives sang drug war victims.#