Imbitaron liwat sang Kamara si former president Rodrigo Duterte nga magtambong sa hearing sang quad comm nga naka-schedule sa Nobyembre 7.
Suno kay Quad comm chairman Rep. Robert Ace Barbers, magapadala sila liwat sang sulat sang imbitasyon sa former chief executive bangud nagpakita man gani ini sa extra-judicial killings inquiry sang Senate Blue Ribbon subcommittee sang nagligad nga Lunes.
Suno naman sa panel co-chair nga si Rep. Benny Abante, na-obserbahan niya nga indi man maluya si Duterte kag sa pagkamatuod, daw siya pa gani ang nagadala sang hearing sa upper chamber bangud sa iya mga statement.
“If he was physically well to attend the Senate inquiry on Monday, he should have no excuse to skip our next hearing,” suno kay Abante.
Ginhangkat sini si Duterte nga magtambong man sa quad comm kag sabton ang mga pamangkot sa drug war kag linibo nga nagkalamatay bangud sa extra-judicial killings.
“We expect the former president to show up in our next hearing. We have many questions to ask him about his war on drugs and the deaths that resulted from it. We believe his answers will give us a more complete picture of the EJKs,” dugang sini.
Una na nga ginsiling ni Abante nga ipamangkot nila ang mga bagay nga wala napadalman sa Senate Blue Ribbon subcommittee hearing kaangay sang pahayag ni Duterte nga naggamit ini sang intelligence funds para sa war on drugs.
Sa senado suno kay Abante, isa lang ka senador ang nagpamangkot sang matuod nga mga pamangkot kag ini amo si Senator Risa Hontiveros, bangud nagaguwa suno sa iya nga naga-alang-alang ang iban nga mga senador.
“There was only one senator that actually asked the real questions and that was Sen. Risa Hontiveros… The other senators were actually timid in asking questions,” pahayag sini.
Sa quad comm suno sa kongresista, indi pagtugutan si Duterte nga magkuha sang microphone kag maghala lang sa paghambal.
“In the quad comm, when we invite him (Duterte), we are ready to ask questions… He’s not going to get the microphone and be the one to speak. He will be there to answer questions,” pahayag sang mamalidha.
Indi man ini pagtugutan nga magpamuyayaw apang indi sila magdagdag sang contempt order bilang pagtahod kay Duterte nga former president sang Pilipinas.
Una na nga nagpangindi ang kampo ni Duterte sang nagligad nga semana nga magtambong sa hearing sa House quad comm bangud indi maayo ang pamatyag sini kag short notice ang nahatag, apang nagpasalig ang iya abogado nga magakadto siya pagkatapos sang Nobyembre 1.
