Indi magtambong via video conference si former President Rodrigo Duterte sa confirmation of charges hearing sa masunod nga semana.
Ginkumpirma ini sang iya defense counsel nga si Nicholas Kaufman.
Suno kay Kaufman, bisan sa labing-una nga pagpakita ni Duterte sa International Criminal Court (ICC) matapos ini nga naaresto sang Marso 11, indi man sini kuntani luyag nga magtambong sa hearing paagi sa video.
Sang amo nga tion suno kay Kaufman, ginhingyo ni Attorney Salvador Medialdea nga i-postpone anay ang hearing kag himuon nga in-court hearing pagka-Lunes sang amo nga tion agud nga makaabot pa si Kaufman sa Netherlands.
Apang wala gin-grant ang amo nga request.
Sa baylo suno sa counsel, bisan nga bag-o lang halin sa ospital, ginpasuksok kay Duterte ang suit nga indi man iya, ginpapungko sa atubang sang camera, kag ginpatambong sa hearing.
Wala na nagkumpirma si Kaufman kun personal ang pagtambong ni Duterte sa masunod nga semana, ukon i-waive sini ang iya kinamatarong sa pagtambong.
Sandig sa ICC website, maga-umpisa ang confirmation of charges sa Pre-Trial Chamber I in Courtroom I sa Lunes, Pebrero 23, halin 10 a.m. tubtub 3 p.m. local time sa The Hague (5 p.m. to 10 p.m. Philippine time).
Patigayunon naman ang masunod nga mga hearing sa Martes, Huwebes, kag Byernes.
Diri nga stage kag ipaathag sang prosecution, defense, kag mga abogado sang drug war victims ang ila nga argumento sa atubang sang judges.
Mahimo ini malantaw online apang may 30-minutos nga delay sa ICC website, Facebook, kag YouTube.
Diri sa confirmation of charges hearing tumuron kun may bastante bala nga ebidensya agud nga maka-establisar sang bastante nga grounds agud patihan nga ang isa ka tawo nagkomiter gid man sang krimen nga amo ang ginkaso sa iya.
Pananglitan may isa ka kaso ukon masobra pa nga makumpirma, ipasaka ang kaso sa Trial Chamber nga amo naman ang magapatigayon sang proceedings sa masunod nga stage nga amo na ang trial.
