Ginpahanugutan sang International Criminal Court (ICC) si former president Rodrigo Duterte nga indi magtambong sa una nga status conference sa iya nga kaso nga crimes against humanity.
Sa pito ka pahina nga order sang ICC Trial Chamber III nga ginpaguwa kagab-i, May 22, gin-grant ang request sang defense team nga i-excuse ang former president sa personal nga pagkadto sa Mayo 27 nga status conference sa The Hague, Netherlands.
Matandaan nga sa hingyo anay sang defense counsel, ginsiling nila nga luyag i-waive ni Duterte ang iya kinamatarong nga mag-atubang sa Chamber kag ginasaligan sini sang bug-os ang iya nga legal team nga ma-address ang procedural matters nga nakakista sa agenda.
Gin-authorize sang Chamber ang waiver apang ginmanduan ang defense team nga magpasa sang pirmado nga request halin kay Duterte tubtub sa Mayo 25.
Sa order sang ICC, pormal naman nga ginpahibalo ang pag-ilis ni Duterte sang legal team.
Kasunod sang pag-withdraw ni Nicholas Kaufman, ginpili sang pamilya ni Duterte ang British barrister nga si Peter Haynes bilang lead counsel kag si Kate Gibson bilang associate counsel.
Suno sa judges, napahibalo na sa bag-o nga legal team ang tanan nga pending deadlines kag nakakumpirma na sila nga magatambong sila sa status conference.
Nahibaluan nga maka-isa ka bes pa lang nga nakit-an si Duterte halin sang gindala siya sa The Hague sang 2025. Natabo ini sang Marso 14, 2025 kadungan sang 26-minute initial proceeding nga ginpakita man via video link. Halin sadto, wala na nagpakita ang former president sa proceedings lakip na sa confirmation stage matapos nga gin-grant naman sang korte ang iya pag-waive sang appearance.
Nahibaluan nga nagdesisyon man ang ICC Trial Chamber III nga indi pa kuwalipikado si Duterte nga maka-avail sang temporary liberty. “The chamber hereby decides that the accused shall continue to be detained,” kabahin sang desisyon sang chamber.#
