May panibag-o na naman nga banat si Presidente Rodrigo Duterte kay Senador Manny Pacquiao nga nagpahayag nga mas naglala pa ang kurapsyon sa Pilipinas sa idalom sang Duterte Administration.
Suno kay Pres. Duterte, dapat nga magtrabaho si Pacquiao bilang senador kag indi masami nga mag-absent.
Pahayag sang presidente sa senador, indi buot silingon nga kampyon ini sa boxing, mangin kampyon man ini sa pulitika.
Una sini, ginpahayag ni Presidential Spokesperson Atty. Harry Roque nga sala ang taktika nga ginhimo nga pag-atake ni Pacquiao kay Duterte.
Nalakip ang pangalan ni Pacquiao sa mga nagaguwa nga posible magpadalagan bilang Presidente sa 2022 elections.
Samtang ginbali naman ni Pacquiao ang nangin pahayag ni Duterte nga nag-isol ini sa away niya batuk kay American boxer Errol Spence Jr.
Suno sa senador, madayon ang iya nga hampang.
Sa pagkamatuod, natalana ang iya nga paghalin sa Pilipinas subong nga weekend agud hatagan sang dungog ang pungsod.
