Luyag ni Presidente Rodrigo Duterte nga hatagan sang dugang nga financial benefits ang Armed Forces of the Philippines (AFP) sang nagpalab-ot ini sang pagpakig-unong sa mga militar sa natabo nga pagtibusok sang C-130 plane sa Patikul, Sulu sa diin 52 ka tawo ang patay lakip na ang 49 ka mga military personnel.
Ginbisita mismo sang Presidente ang mga “fallen soldiers” sa Western Mindanao Command sa Zamboanga City.
Suno kay Duterte, antes magtakop ang iya termino, luyag niya nga magbutang sang dako nga kwarta sa AFP.
Ini ang pamaagi sang presidente nga makabawi sa mga suldado ilabi na sa mga napatay.
Pahayag niya, magabaton sang retirement benefits ang mga militar gikan sa Government Service Insurance System.
Ang pamilya sang mga suldado ang protektado man kag ang edukasyon sang ila mga kabataan ang sigurado na.
Samtang nagahatag sang mensahe ang presidente sa pamilya sang mga nagtaliwan nga military personnel, ginapunggan man niya ang pagtulo sang iya luha.
Base naman sa statement ni Senator Christopher Bong Go nga kaupod ni Duterte sa Zamboanga City, hatagan sang medical treatment kag suportahan ang mga suldado tubtob sila ang maka-recover.
