ILOILO CITY – Sundon sang Malacanan Palace ang rekomendasyon sang Armed Forces of the Philippines kag Department of National Defense may kaangtanan sa Martial Law sa Mindanao.
Sa interview sang Bombo Radyo Iloilo, ginpahayag ni Presidential Legal Counsel Salvador Panelo nga apisar indi luyag sang presidente nga palawigon ang Batas Militar kun ini ang ginapangayo sang kahigayunan, wala sang mahimo ang gobyerno.
Ginauyatan na ni Presidente Duterte ang rekomendasyon suno kay Atty. Panelo.
Dugang pa sang Presidential Legal Counsel, posible nga sa mga speaking engagements sang presidente, iga-anunsyo sini ang desisyon may kaangtanan sa Martial Law.
Ang Kongreso ang magahimo sang tikang suno kay Panelo, sa ti-on nga magdesisyon si Presidente Rodrigo Duterte nga palawigon ang Martial Law sa Mindanao.
Ginpahayag ni nga santu sa Konstitusyon, hingyuon lang sang presidente sa Kongreso nga palawigon ang Martial Law nga una na sini gindeklarar.
Lima ka adlaw na lang ang nabilin antes mag-expire ang Martial Law sa Hulyo 22.
Apang malaba pa ini nga tiyempo suno kay Atty. Panelo para maghingyo si Presidente Duterte sa Kongreso.
Indi man mabudlay suno kay Panelo para sa presidente ang pagdesisyon bangud adlaw-adlaw man ini nga nagabaton sang impormasyon sa sitwasyon sa Marawi.