Ginhingyo ni former President Rodrigo Duterte sa Appeals Chamber sang International Criminal Court (ICC) nga indi na naman ini magtambong sa pag-deliver sang Chamber sang ila desisyon sa Abril 22.
Ini nga desisyon ang naangot sa apelar sang kampo ni Duterte nga nagakwestyon kun may hurisdiksyon ang korte sa iya kaso nga crimes against humanity.
Wala sang rason nga ginhatag si Duterte, apang ginbutang sini sa iya sulat nga gina-waive sini ang iya kinamatarong nga magkadto personal sa korte.
Sa baylo nga si Duterte, ang iya mga abogao ang magatambong.
Nahibaluan nga ang hurisdiksyon amo ang isa sa mga punto nga ginabalik-balikan sang kampo ni Duterte.
Matandaan nga una na nga ginbasura sang Pre-Trial Chamber (PTC) I sang Oktubre 2025 ang amo nga petisyon ni Duterte, apang ginpasaka ini sa Appeals Chamber agud i-apelar nga baliskaron ang amo nga desisyon.
Magluwas diri, may nauna man sila nga mga petisyon para sa interim release kag health status sang former president.
Sa confirmation of hearing, wala man nagtambong si Duterte bangud ginapanindugan sini nga wala niya ginakilala ang hurisdiksyon sang amo nga international tribunal.
Ginsiling sini sa PTC nga tigulang kag maluya na siya kag ginabaton sini ang posibilidad nga mapatay siya samtang naka-detain didto sa The Hague, the Netherlands.
Nagapangatubang si Duterte sang three counts of murder nga crime against humanity bilang “indirect coperpetrator” sa mga pagpamatay sang ginpatuman ang drug war.#
