Posible nga nakulbaan si Presidente Rodrigo Duterte nga magpanaog sa pwesto rason nga nagpabutyag ini sang interes nga magpadalagan sa pagka-bise presidente sa 2022 elections.
Matandaan nga makapila naman ka beses nga ginpahayag ni Duterte nga ikonsidera na sang publiko ang iya pagpadalagan sa ika-duha sa pinakamataas nga posisyon sa pungsod.
Sa interview sang Bombo Radyo kay Atty. Joenar Pueblo, iya ginpahayag nga mahimo gina-antisipar na sang presidente nga pagkatapos sang iya nga termino, may yara sang nagahulat sa iya nga kaso ilabi na sa International Criminal Court (ICC).
Apang wala sang may makapugong kay Duterte bisan pa ang konstitusyon suno kay Atty. Pueblo bangud nasaad nga mahimo gid siya makapadalagan sa pagka-bise presidente ukon sa ano man nga posisyon magluwas lang sa pagpare-elect ukon liwat nga magpapili sa pagka-presidente.
Dako man ang posibilidad nga mangin runningmate ni Pres. Duterte ang iya anak nga si Davao City Mayor Sara Duterte-Carpio nga amo ang magapadalagan sa pagka-presidente.
Nakapabutyag naman si Mayor Sara nga ginakonsidera na niya ang pagpadalagan sa pinakamataas nga posisyon.
“Political Succession” naman ang tawag pahayag sang abogado KUN pagabuslan sang bise presidente ang presidente sa tion nga magdesisyon ini nga magpanaog sa pwesto.
Nahibaluan nga ang kwalipikasyon sa pagpadalagan sa pagka-presidente sa Pilipinas ang simple lamang sa diin kinahanglan lang nga mangin natural born Filipino citizen, indi dapat magnubo sa 40 anyos ang edad sa tion sang eleksyon, nakahibalo magbasa kag magsulat kag dapat nga botante sang pungsod.
