Ginsabat ni Presidente Rodrigo Duterte ang mga kritiko nga nagpakamalaot sa iya bangud wala siya nakit-an sang naglaslas ang Super Typhoon Rolly sa pila ka bahin sang Luzon.
Sang Domingo, Nobyembre 1, sang nagpanghalit ang mabaskog nga bagyo apang natabuan man nga yara si Presidente Rodrigo Duterte sa Davao City rason nga absent siya sa Cabinet briefing sa amo nga adlaw.
Bangud sini, gingamit sang mga netizen ang hashtag nga ‘Nasaan ang Pangulo?’ kag gilayon man nga nag-trend sa social media.
Ginkwestyon sang presidente kun ano ang problema sang iya mga kritiko, bangud suno sa iya, ginpadala man sa iya ang mga dokumento nga kinahanglan pirmahan kag machine lang ang kinahanglan.
Sarkastiko pa nga ginpamangkot ni Presidente Rodrigo Duterte ang publiko kun luyag nila nga magtindog siya sa white sand ukon crushed dolomite beach sa Manila Bay agud lamang mapakita nga ara na ang iya presensya.
Nagapanindugan ang presidente nga ginhulat lang niya nga makaagi ang bagyo kag nagbyahe man siya pabalik sa trabaho.
Kahapon, Nobyembre 2, nagpatigayon sang aerial survey si Duterte sa Catanduanes kag Albay provinces kun sa diin natabo ang duha ka una nga mga landfall ni Bagyo Rolly.
