Ginsapubliko ni anay Presidente Rodrigo Duterte ang ginaalegar nga mga anomaliya ukon mga iregularidad sa idalom sang 2025 national budget nga pirmado na ni President Ferdinand Marcos, Jr.
Pahayag sang anay presidente, may pila ka mga probisyon sa budget nga ginbilin nga blangko sa bicameral conference committee report.
Kun may missing nga budget amounts, daw kaangay lang ini suno sa Duterte nga may ginhatag nga blangko nga cheke sa gobyerno kag ang gobyerno na ang bahala kun pila nga kuwarta ang ila kuhaon.
Ang ginaalegar nga discrepancy sa P6.3 trillion national budget ang una nga natukiban ni Davao City 3rd District Rep. Isidro Ungab nga anay chairman sang House appropriations committee. Ang ginaalegar nga blangko nga entries sa bicam report ang nakit-an sa budget sang Department of Agriculture (DA) kag unprogrammed appropriations.
Ginpahayag ni Ungab nga indi lamang simple nga typographical, grammatical, ukon printing error ang blangko, kundi maathag nga may discrepancy bangud binilyon ka pesos ang involved sa madamo nga pahina.
“These are not, I would say, ordinary figures, because these figures are billions of pesos… Madaming pages yung ganito… Ang ibig sabihin merong discrepancy, so paano nagkadiscrepancy?,” suno kay Ungab.
“With all these findings, makikita natin na defective yung bicam report, at bakit pinirmahan ng members? So, the House and the Senate ratified [a] defective bicam report. In other words, apektado yung ating [General Appropriations Act], because the bicam report was defective,” dugang sini.
Suno naman kay Duterte, indi pwede nga blangko lang ang budget items kag matu-matuhan nga butangan lang ugaling. Dapat suno sa iya nga nakaplastar na nga husto kag kumpleto sa bicameral report.
“Pagka ganoon, there’s something terribly wrong… As a matter of fact, I would say kung may mga blanko yan na lumusot, that is not a valid legislation. Kung nasa batas na ‘yan, lumabas na ‘yan ng blanko-blanko, either it could be filled up before or after sa Congress… Pagka putol-putol yan o kulang, that is not a valid budget for implementation,” pahayag sini. “It’s not only inaccurate, but I think the budget, in totality, is invalid.”
Bangud sini, nagpanawagan ang former president nga i-recall kag i-correct ang 2025 budget. Nagpanawagan man ini nga magpaathag ang tanan nga yara sa likod sang ginalegar nga iregularidad.
“That is falsification of law… Perjury, forgery, and it can only amount to one thing—criminal action. You can all go to jail for that,” suno sa former president. “Nakikiusap ako sa mga u**l na ‘to, kung sino ‘yung gumagawa ng ganoon, puwede ba sabihin ko sa inyo na do not [mess with] the people of the Philippines? Magkagulo tayo.”
Disyembre 11 sang ginratipikahan sang Kamara kag Senado ang bicam report sa 2025 General Appropriations bill nga nagalakip sang pagbuhin sang pondo sa education and health sectors.
Disyembre 30 naman sang ginpirmahan ni President Marcos ang national budget kag direkta nga gin-veto ang masobra P194 billion nga balor sang line items nga ginpahayag indi consistent sa prayoridad sang administrasyon lakip na ang pila sa mga programa sang Department of Public Works and Highways.#
