ILOILO CITY- Wala sang sarang nga mapadayaw ang Duterte Administration sa ulihi nga State of the Nation Address sang presidente subong nga hapon.
Ini ang pahayag ni Sonny Africa, Executive Director sang IBON Foundation.
Sa interview sang Bombo Radyo kay Africa, iya ginpahayag nga isa ka maluya nga ekonomiya kag pinakamanubo nga numero sang trabaho nga nahatag sa mga Filipino ang legasiya nga ibilin ni Presidente Rodrigo Duterte.
Suno sa natungdan, ini ang pinakamalala nga sitwasyon sang pungsod kun ipaanggid sa nagligad nga mga administrasyon pagkatapos sang Martial Law.
Ginpahayag niya nga mangin ang source sang trabaho nga amo ang sektor sang agrikultura kag lokal nga industriya ang wala ginhatagan sang suporta,kag, sa baylo, gin- gasto sang gobyerno ang pondo para sa Build Build Build nga suno kay Africa, indi solusyon sa tunga sang pandemya.
Suno pa sa iya, ginkinot man sang gobyerno ang stimulus packages nga Bayanihan 1 kag 2 rason nga mas nag-antos pa gid ang mga Pilipino sa baylo nga nahatagan kuntani sang alibyo ang ila pigado nga sitwasyon.
