SUDAN – Indi tuman ka accessible ang health care services sa Sudan ilabi na subong nga may yara sang Coronavirus Disease 2019 (COVID-19).
Suno kay Bombo International Correspondent Vencent Ryan Perez, ang mga hospital ang napahamtang lang sa mga dalagku nga syudad sa Sundan kag ang mga naga-istar sa uma ukon sa bukid ang kinahanglan pa nga magbyahe agud lamang nga makapabulong ukon makapa-admit.
Ginpahayag ni Perez nga sa una, 6:00 sa aga tubtub 6:00 sa hapon lang ang tion agud nga makaguwa sa balay ang mga Sudanese apang subong nga nagasaka ang numero sang kumpirmado nga kaso, ang curfew ang gin-isol sa 1:00 sa hapon.
Nakumpirma ang local transmission sa Sudan suno kay Perez duha ka semana pa lang ang nakaligad apang sa pihak sini, indi tuman ka istrikto ang pagsuksok sang facemask sa tion nga magguwa sa balay.
Ang Sudanese people suno kay Perez ang nagakalipay ilabi na kun Filipino ang medical personnel nga nagatapatap sa ila apang indi man malikawan kun kaisa nga masal-an nga Chinese ang iban nga Overseas Filipino Worker sa Sudan.
Sa iya ginatrabahu-an nga hospital suno kay Perez, ginapaidalom gid sa screening ang mga pasyente agud matumod kun sanday sin-o ang positibo sa COVID-19 kag kun sanday sin-o ang negatibo sa nasambit nga virus.
Bangud sa amat-amat nga pagsaka sang numero sang kumpirmado nga kaso, ginpahayag sang natungdan nga may yara man sang adjustment sa duty hours sang tanan nga medical personnel sa hospital nga iya ginatrabahuan.
