Nagluntad ang sunog kaina sang aga sa Zone 11, Brgy. Calaparan, Arevalo, Iloilo City, nga naglamon sa isa ka abandonado kag bag-o pa lang natukod nga two-storey house.
Sa interview sang Bombo Radyo kay Brgy. Kagawad Rodrigo Montaño, iya ginpahayag nga ginapanag-iyahan sang isa ka construction worker sang una ang two storey nga balay, samtang ang isa naman ka balay abandonado na bangud nagsaylo na ang nagapuyo sa iban nga lugar.
Suno sa mga pumuluyo nakabati sila sang “nagsinagabong” antes naglapta ang kalayo, rason nga nagduda sila nga mahimo nga may electrical short circuit ukon may naglupok anay antes nagluntad ang dako nga sunog.
Gilayon naman nga ginkadtuan ini sang masobra pulo ka mga fire trucks nga nagresponde sa lugar agud mapalong ang kalayo.
Nagpahamtang naman ang barangay sang evacuation centers, kag naka-standby man ang food assistance para sa mga apektado nga residente.
Padayon pa ang imbestigasyon sang Bureau of Fire Protection (BFP) sa gintunaan sang sunog.
