Duwa ka mga produkto sang Iloilo Science and Technology University nga nangin topnotchers sa June 2026 Licensure Examination for Architects ang nagpakigbahin sang ila madinalag-on nga estorya sa kurso nga ila ginkuha sa kolehiyo.
Ini amo sanday Architect Peter Banjao Zarriz nga Rank 6 kag may rating average nga 88.50%, samtang Rank 10 naman si Architect Krisha Angeli Potenti Raquiz nga may rating naman nga 87.70%.
Sa interview sang Bombo Radyo kay Raquiz, iya ginpahayag nga bangud sa impluwensya sang iya nga mga abyan rason nga ginkuha sini ang kurso nga sang nagdugay na amat-amat naman sini nga ginpalangga.
Suno pa sa iya nga indi nangin mahapos ang kada school requirements nga gina-demand sa Architecture course apang may ara sang fulfillment kag naga-motivate sa iya nga magpadayon sa kada may isa ini ka plates nga matapos apisar mabudlay ang proseso.
Pahayag pa ni Raquiz nga sang tion nga nagkuha na ini sang pasinawan, suno pa sa iya nga importante ang commitment kag disiplina sa kaugalingon, amo man ang insakto nga oras sang pagpahuway agud maabsorb ang ginatun-an.
Dugang pa sini nga nangin very supportive naman ang iya nga mga ginikanan sa iya nga handom ilabi na sang tion nga nag-review ini kag ginahatag gid ang iya nga mga kinahanglanon.
Nagapasalamat man ini sa mga tawo nga nangin parte sang iya nga kadalag-an nga suno pa sa iya nangin possible bangud man sa ila nga bulig kag suporta.
Sa bahin naman ni Architect Peter Banjao Zarriz sang Balasan Iloilo, ginsaysay sini ang iya nga journey sa Architecture course bilang isa ka produktibo nga lima ka tuig nga paghanas sa kolehiyo.
Sa interview sang Bombo kay Zarriz, iya ginpahayag nga mahuyugon ini sa pag-sketch sa kun ano-ano man nga butang nga gusto sini himuon.
Pahayag pa sini nga wala gid ini nag-ekspektar nga sa lima ka tuig sini nga paghimakas makuha sini ang ika-anom nga pwesto sa amo nga pasinawan, apang suno pa sa iya nga maayo gid nga mabalik sini ang kadungganan sa iya nga mga Alam matter.
Suno pa kay Zarriz nga bangud man sa pagbinuligay kag pagsuportahanay nila nga mag-classmates sa ila nga section sa Archi nangin maayo ang balik sini sa ila kun sa diin nabaslan ini sang dugang nga titulo sa ila nga mga pangalan.
Ginpakigbahin man sini nga importante ang paghimo sang maayo nga daily routines kag habits agud magamit mo ini sa paglab-ot sang imo nga handom.
Importante man suno sa iya ang pag-atipan sang kaugalingon kag indi pagkalimtan ang pagpahuway.
Nagpanugyan man ini sa mga kaangay niya man nga Archi students nga seryosohon ang Pre-board bangud training ground na ini sa mas dako nga pagpangahangakat sa pag-take na sang exam.
Nagapasalamat man ini sa pagpalangga kag suporta sang iya nga pamilya nga nagkonsiderar gid sa iya nga schedule agud makapreparar ini sa exam kun sa diin nangin Rank 6 ini sa kabilugan nga takers sa June 2026 Licensure Examination for Architects.
