Patay ang duwa ka katapo sang Philippine National Police (PNP) kalakip ang isa ka police lieutenant matapos ang shooting incident sa sulod mismo sang estasyon sang Provincial Explosives Ordnance Disposal and Canine Unit (PECU) sang Abra Police sa Casamata Hill, Zone 5, Bangued, Abra.
Ang napatay amo sanday Police Staff Sergeant O’Neal Ryan Calica kag ang hepe sini nga si P/Lt. Jamieson Bulatao, officer-in-charge sang PECU.
Suno sa imbestigasyon, bag-o lang nag-abot sa ila opisina si Calica kag sang hinali lang nagqwa sa kuwarto ang superior sini nga si Lt. Bulatao.
Nag-load sang bala sa iya nga pusil si Bulatao kag gintiro si Calica sang apat ka beses.
Sunod nga gintiro ni Bulatao ang isa pa ka pulis nga si P/Senior Master Sergeant Edwin Bandoc kag maswerte nga wala ini maigo.
Nagbalos si Bandoc kag naigo si Bulatao.
Gindala ang mga pilason nga pulis sa ospital apang gindeklarar nga dead on arrival.
Nagsungka naman si Bandoc sa Abra Police matapos ang insidente kag ginpanindugan nga self defense lang ang iya ginhimo.
Padayon pa ang imbestigasyon apang nagwa ang impormasyon nga nangakig si Bulatao sang ginsugid siya ni Calica sa Police Regional Office nga hubog ini nga naga-duty.
