Natigayon na nga ma-identify sang Iloilo City Police Station 10 ang duwa sa tatlo ka mga suspek nga nagsaputi sa isa ka call center agent sa SM Strata, Mandurriao, Iloilo City.
Sa interview sang Bombo Radyo kay Police Captain Val Cambel, Officer-in-Charge sang Iloilo City Police Station 10, iya ginpahayag nga sa bulig sang eye witness natigayon nga ma-identify ang mga suspek.
Suno kay Cambel, indi pa sila makahatag sang mga pangalan sang mga suspek, apang lunsay ini nga mga residente sang Barangay Bolilao, Mandurriao, Iloilo City.
Dugang pa niya, isa sa mga na-identify nga suspek ang may yara sang kaso nga pagpangbuno kag involved sa mga kinagamo sa nasambit nga Barangay.
Madumduman nga sang Abril 23 sang gulpi lang nga ginkastigo sang tatlo ka mga kalalakinhan ang call center agent samtang nagabantay sang jeep sa atubang sang SM Strata.
Sa subong, padayon pa nga nagatipon sang mga ebidensya ang mga otoridad agud nga nga maka-file na sang nagakaigo nga mga kaso batok sa mga suspek.
