Samtang naga-hanas pa para updan ang team sang Pilipinas sa nagahilapit nga 33rd Dubai International Basketball Championship sa United Arab Emirates, bukas ang National Basketball Association (NBA) star nga si Dwight Howard nga makahampang pa para sa pungsod kun kuhaon siya sang Philippine Basketball Association (PBA).
Apang pananglitan kuhaon siya sang PBA, naglahog kag naghingyo ang former three-time NBA Defensive Player of the Year nga kuntani may adjustment lamang sa kataason sang player.
Suno sa 38-anyos nga basketball star, 6-foot-9 lamang ang iya nga height nga amo man ang maximum height nga gin-set agud makahampang ang import sa premier basketball league sa Pilipinas.
“Guys like Dray can come back and play here as well. I know he wanted to play here in the PBA so you know, if they change the height requirements, maybe we’ll see twin towers in the Philippines,” pahayag sini nga nagatumod kay Andray Blatche.
Antes ang pag-upod sa Strong Group-Philippines sa Dubai, nakahampang si Howard sa T1 League sa Taiwan kasunod sang iya malawig man nga karera sa NBA halin sang 2004 tubtub sang 2022.
Sa amo nga mga tinuig, madamo man nga teams ang iya nasudlan apang naglawig ini sang siyam ka tuig sa Orlando Magic.
Sa subong, todo-hanas anay si Howard para sa pasakupan sang Pilipinas nga tournament sa Dubai nga magasugod sa Enero 19.
Pamunuan sini ang team nga may yara sang mga beterano kag rising stars agud nga makatimalos kag ma-redeem ang kaugalingon halin sa quarterfinal exit sang pungsod sang nagligad nga edisyon.
Lakip sa magaupod sa UAE amo ang naturalized Filipino nga si Blatche, McKenzie Moore, kag Andre Roberson, samtang ang locals naman amo sanday MPBL MVP Justine Baltazar, UAAP MVP Kevin Quiambao, kag former Gilas member Jordan Heading.#
(Photo: Strong Group Athletics)
