Pat-od nga mabakod gid ang Strong Group sang Pilipinas nga ipadala sa 33rd Dubai International Basketball Championship subong nga Enero bangud sa eight-time NBA All-Star kag three-time Defensive Player of the year nga si Dwight Howard, anay Oklahoma City Thunder guard nga si Andre Roberso, kag Gilas Pilipinas naturalized player nga si Andray Blatche.
Ginkumpirma sang head coach nga si Charles Tiu ini nga development para sa team samtang nagahilapit na ang hinampang nga nakatalana sa Enero 19-28.
Suno kay Tiu, magaabot sa masunod nga semana si Howard.
Antes ang paghampang para sa Pilipinas, nakaagi ang nasambit nga one-time NBA champion sa Taoyuan Leopards sa T1 League sa Taiwan.
Kilala man siya sa iya stints sa Orlando Magic, Los Angeles Lakers kag Houston Rockets sa NBA kag nakasulod man sa Atlanta, Charlotte, Washington kag Philadelphia.
Magluwas anay NBA players, featured man sa hampang sang Pilipinas sa Dubai ang local talents kaangay sang UAAP Season 86 Most Valuable Player nga si Kevin Quiambao kag Francis Escandor sang La Salle kag si JD Cagulangan sang University of the Philippines.
Ang Former Bay Area Dragons head coach nga si Brian Goorjian ang mangin kabahin man sang coaching staff.
Sang 2023, nagtapos ang kampanya sang Strong Group sa quarterfinals sang tournament sa bulig sang former NBA players nga sanday Nick Young kag Shabazz Mohammad.
