Hingalitan sang Dallas Mavericks ang homecourt advantage subong nga adlaw, Hunyo 13, agud nga makabangon na matapos nalubong sa 2-0 deficit sa serye sa National Basketball Association (NBA) finals batok sa Boston Celtics.
Matapos ginlampaso sang Celtics sa duha ka nauna nga hampang sa TD Garden sa Boston, Massachusetts, tyempo na subong sang Mavs nga magbawi sa American Airlines Arena sa Dallas 8:30 subong nga aga (oras sa Pilipinas).
Sa maragtas sang liga, lima pa gid lamang ka teams sa finals ang nakabutwa sa 2-0 deficit nga nahimo sang Milwaukee Bucks sang 2021; Cleveland Cavaliers sang 2016 kun sa diin yara man anay si Kyrie Irving kaupod si LeBron James; Miami Heat batok sa Mavs sang 2006; Portland Trailblazers sang 1977; kag Boston Celtics sang 1969.
Sa Game 3, daku nga pagpanghangkat sa Boston ang panibag-o kag seryoso nga lower leg injury sang forward sini nga si Kristaps Porzingis nga lain pa gid sa calf injury sini nga rason kun nga masobra isa ka bulan nga wala nakahampang sa playoffs.
Sa Mavs naman, ginabati-bati nga magapatublok gihapon sang pain-killing injection ang Slovenian superstar nga si Luka Doncic kaangay sa ginhimo sini antes ang Game 2 sa Boston bangud sa chest contusion.
Kwestyonable anay si Doncic sa Game 2 bangud sa leg, ankle, kag chest injuries, apang nag-abot ini sa court nga naputos halos ang lawas apang nagwaswas sang 32 points, 11 rebounds, kag 11 assists sa sulod sang 42 minutos sini nga appearance sa sambuwa.
Bantayi ang coverage sang sini nga hampang diri lang sa Bombo Radyo Iloilo.
