Nagapati si Presidente Rodrigo Duterte nga magapabilin ang political dynasties sa Pilipinas magluwas lang kun ini ang bag-uhon sa Constitution ukon dululungan ini nga likawan sang mga Filipinos.
Suno kay Pres. Duterte, indi man malain ang dynasties kun siya ang pamangkuton.
Pahayag niya, napabilin sang iya pamilya ang ila nga “stronghold” sa Davao bangud ini ang gusto sang mga tawo.
Sang nagtakop ang termino ni Duterte bilang alkalde sang Davao City, madamo ang nagtulod kag nagpabor nga mga tawo nga ang iya anak nga si Sara Duterte-Carpio amo ang magabulos sa iya.
Samtang si Paolo Duterte naman amo ang congressman sang Davao City 1st District kag vice mayor sang Davao City amo si Sebastian Duterte, lunsay mga anak sang presidente.
Nahibaluan nga sa idalom sang Constitution, banned ang political dynasties apang naga-require sang layi ang provision, sa diin napaslawan ang Kongreso nga mapasar sa sulod na sang 33 ka tuig.
