Nagahibubun-ot ang iban nga mga driver sang electronic bikes kag electronic tricycles (e-bikes kag e-trikes) kasunod sang anunsyo sang Land Transportation Office (LTO) nga ipang-impound ini nga mga salakyan nga madakpan nga naga-operate sa mayor nga mga dalanon.
Sa interview sang Bombo Radyo kay Elmer Gacita, nagabyahe sang e-bike sa Duran, Iloilo City Proper, iya ginpahayag nga madasig mag-akto ang gobyerno sa mga bagay nga indi man nila makuwartahan.
Suno sa iya, may iban man nga drivers nga indi salawayon kag nagasunod gid sa patakaran.
Gindugang niya nga madulaan gid ang iban sang palangabuhian kag magutman ang ila pamilya kun mangdakop na ang awtoridad.
Sa iya bahin, nagalab-ot sa P400 tubtub P500 ang iya kita sa pagbyahe halin alas sais sa aga tubtub alas singko sa hapon, apang ginabayad pa sini ang P170 sa arkila kada adlaw.
Base sa pasalig ni LTO chief Assistant Secretary Markus Lacanilao sa plenary session sa Senado, maga-umpisa ang pagpangdakop sa e-trikes sa Disyembre 1.
Namunuhan sa Senado nga indi kaangay sa traditional tricycles, indi rehistrado sa LTO ang e-trike kag e-bike operators kag drivers, wala sang lisensya, kag wala man sang insurance.
May suhestyon man sa upper chamber nga dapat maghimo sang kasugtanan ang LTO kag ang local government unit nga ma-regulate ini nga mga salakyan, apang dapat siguruhon nga indi man mapatay ang palangabuhian sang traditional tricycles.
