Napaslawan ang Philippine women’s football team nga madepensahan ang titulo sini sa 2025 AFF Women’s Championship ukon kilala man nga MSIG Serenity Cup.
Ini matapos nagtakop ang hampang sini batok sa Myanmar sa 1-1 draw paagi sa isahanon nga goal ni Nina Mathelus sa ika-71 nga minuto sang sambuwa sa Lach Tray Stadium sa Haiphong, Vietnam.
Nagsugod ang kampanya sang Pilipinas subong nga tuig nga may 7-0 nga kadalag-an batok sa Timor-Leste, apang wala ini nasustiner sang nalutos ang team sa kamot sang Australia sa ikaduha nga hampang.
Bangud sa draw, ikatatlo lamang ang team sa Group B nga may 4 puntos sa isa ka daog, isa ka draw, kag isa ka kalutusan.
Nagpanguna sa group phase ang Myanmar nga may 7 points samtang nagpangaduha naman ang Australia nga may six points, kag pareho sila nga nag-abante sa semifinals kaupod sa Thailand kag host nga Vietnam nga nangin top two teams man sa ila nga grupo.
