Nag-umpisa na kahapon Enero 31 kag magalawig tubtob Pebrero 27 ang early registration para sa mga estudyante nga maga-eskwela sa mga pampubliko nga eskwelahan.
Sa interview sang Bombo Radyo kay Leonil T. Salvilla, spokesperson sang DEPED Schools Division of Iloilo, iya ginpahayag nga dako ang bulig sang early registration sa Department of Education (DepEd) bangud paagi sini mahibaluan nila ang numero sang mga estudyante nga maga-enroll sa masunod nga school year.
Ini ang magabulig sa pagpreparar sang nagakaigo nga learning resources para sa mga learners.
Isa man sa ginatutukan sang early registration amo ang pagsiguro nga tanan nga lima (5) ka tuig ang edad nga kabataan ma-enroll sa Kindergarten.
Paagi sini, ma-map sang DepEd ang mga kabarangayan kag kabalayan nga may yara sang kabataan nga naga-eskwela ukon wala pa kag agud mapabalik sang mga ini sa pag-eskwela.
Ginpahayag sang DepEd Iloilo nga ila handum nga kada bata nga Ilonggo mahatagan sang quality, accessible kag relevant nga edukasyon, kag ang early registration amo ang una nga tikang agud matuman ini nga katuyuan.
Samtang, ginpahayag man ni Abraham “Bam” Imas, Education Program Supervisor para sa TLE/TechVoc/TVE kag Special Needs Education, nga pwede gid makaparehistro ang mga kabataan nga may special needs, subong man ang mga kabataan nga indi pa handa ukon indi makasulod sa formal schooling.
Pwede ini palistahon sang mga ginikanan bangud ang ini nga programa inclusive kag para sa tanan.
Ginpasiguro man sini nga “no collection” kag “no payment policy” sa pagparehistro.
Samtang, suno naman kay Michelle Norico, Education Program Specialist II sang Alternative Learning System (ALS), ang ALS isa ka paglaum kag ikaduha nga kahigayunan para sa mga indibidwal nga wala nakatapos sang pag-eskwela.
Paagi sa ALS, may yara pa sang oportunidad nga makabulig agud nga makabangon kag makapadayon sa edukasyon ang isa ka tawo nga nagalaom para sa masanag nga palaabuton paagi sa training nga ila ginahatag.
Para sa mga kabataan kag indibidwal nga wala nakatapos sang pormal nga edukasyon, ginapaathag nga pwede sila maka-enroll paagi sa Alternative Learning System (ALS).
