Ginbuylugan sang mga Ilonggo ang ginpatigayon nga Earth Hour kagab-i, Marso 28 nga nag-umpisa halin trenta minutos ang makaliad sa takna nga alas otso sa gab-i tubtob trenta minutos ang makaligad sa takna nga alas nwebe sa gab-i.
Naglab-ot naman sa kapin 700 ka mga indibidwal ang nagbuylog sa ika-apat nga tuig sang “Ligum-Dulom” ukon Earth Hour celebration sa Iloilo Provincial Government bilang kabahin sang kampanya para sa pag-amlig sang kalibutan kag pagkinot sang enerhiya.
Nagbuylog man sa Earth hour ang mga commercial establishments sa Distrito sang Mandurriao, Iloilo City, nga nagpakita man sang ila suporta sa nasambit nga inisyatibo.
Sa amo nga okasyon, ginpangabay ang publiko nga magpatay sang mga non-essential lights ukon indi man kinahanglanon nga suga sang isa ka oras.
Ini nga buluhaton ang nagasimbolo sang pag-ugyon sang pumuluyo para sa pagkonserbar sang kuryente.
Nahibaluan nga gin-engganyo man ni President Ferdinand Marcos Jr., ang tanan nga mga Pilipino nga mag-upod sa pag-obserbar sang Earth Hour kahapon nga adlaw.
Suno sa presidente, tion ato agud binag-binagon sang mga tawo ang ginapangatubang sang kalibutan nga climate change kag iban pa nga environmental issues.
Lakip man ang paggamit sang insakto sa kuryente kag petroleum products sa tunga sang nagapadayun nga krisis sa Middle East kun sa diin apektado ang Pilipinas.
Madumduman nga nagdeklarar si President Ferdinand Marcos Jr., sang nagligad nga Marso 24, nga yara na sa idalom sang national energy emergency ang pungsod matapos ang padayun nga pagsaka sang presyo sang mga produktong petrolyo.
