ILOILO CITY – Pabor ang East Baluarte Molo, Iloilo City nga mas tempranuhon sang Iloilo City Government ang curfew para sa mga menor de edad.
Ini amo ang alas 8:00 sa gab-i tubtob alas 4:00 sa kaagahon nga pagdumili sa mga kabataan nga makaguwa sa mga dalanon.
Sa exclusive interview sang Bombo Radyo kay Punong Barangay Gary Patnubay, iya ginpahayag nga nagapasalamat man siya kay Mayor Jerry Treñas sa pagbalik sang curfew for minors.
Suno kay Patnubay, madamo sila nadakop nga kabataan sang tinalikdan nga mga inadlaw nga nagaguluwa sa kagab-ihon.
Pahayag ni Patnubay nga ginapatulog lang sang kabataan ang ila ginikanan kag maguwa sa dis-oras sang gab-i.
Dugang pa sang natungdan nga sa subong, gina-implementar kag hugot ang pagpatuman sa mga kabataan ang curfew.
Samtang, nagapatuman naman sang barangay ordinance ang East Baluarte Molo, Iloilo City may kaangtanan sa road clearing operations.
Sa exclusive interview sang Bombo Radyo kay Punong Barangay Gary Patnubay iya ginpahayag nga nagpatigayon sila sang No Parking Ordinance sa mga pumuluyo sa diin tagaan sang penalidad ang mga magasablag sa dalanon.
Lakip sa penalidad amo ang P500 sa first offense, P700 sa ikaduha nga offense kag P1,000 naman ang ikatlo nga offense.
Suno kay Patnubay, padayon nga ginaduso ang nasambit nga ordinansa agud mangin madinalag-on man ang ila nga lugar sa pagtuman sang clearing operations.
