Padayon nga kakulangan sa pondo kag mga health worker ang isa sa mga rason kun ngaa indi madasig ang pagsabat sang ebola outbreak sa Democratic Republic of Congo.
Suno sa World Health Organization ukon WHO, naglapta na ang outbreak sa anom ka probinsya halin sa una nga naapektuhan sini nga probinsya nga Bunia sa amo nga pungsod.
Bangud sini, nagtukod ang mga awtoridad sang mas madamo nga treatment center nga mas malapit sa mga komunidad nga apektado.
Masobra 6,000 ka indibidwal ang nalatnan kag masobra 3,100 naman ang napatay bangud sa outbreak kun sa diin ginakonsiderar ini bilang Ebola epidemic sa nasambit nga pungsod.
May ara naman sang masobra 1,400 treatment beds sa 59 treatment centers, apang kinahanglan pa sang dugang nga 1,600 ka mga katre.
Samtang, nagakinangalan naman sang dugang nga 5,000 ka health worker nga ma-recruit kag ma-train agud mapasangkad ang kapasidad sang mga treatment center.
Base sa record sang WHO, dako nga pagpanghangkat ang kakulangan sa mga international organization nga may ara sang nagakaigo nga training sa Ebola response.
Nagapanawagan naman ang WHO sa mga donor sang dugang nga kontribusyon sa 1.3 billion US dollar nga response plan sang Congo para sa masunod nga anom ka bulan.
