Dako ang nangin bulig sang pagpatuman sang enhanced community quarantine agud mapunggan ang paglapta sang African Swine Fever.
Suno kay Department of Agriculture Secretary William Dar, bangud sa pagpatuman sang enhanced community quarantine, napilitan nga ipasarado ang ila mga negosyo ilabi na ang mga nagabaligya sang infected nga baboy.
Sa pihak sini, gin-ako ni Dar nga apektado sa gihapon ang hog industry sang Pilipinas.
Dugang sang natungdan, posible man nga magnubo ang suplay sang baboy sang 85,000 metriko tonelada ukon katumbas sang masobra 30 ka adlaw nga suplay sa katapusan sang 2020.
Sa subong suno kay Dar, yara pa sa estable nga kondisyon ang presyo sang baboy kag bastante pa ang suplay samtang ginapatuman ang enhanced community quarantine sa pila ka mga lugar sa pungsod.
