ILOILO – Ipatuman epektibo 12:00 karon sa kagab-ihon, Hunyo 30, ang enhanced community quarantine sa banwa sang Alimodian, Iloilo.
Ini matapos naka-record ang banwa sang 13 ka kaso sang coronavirus disease 2019 (COVID-19).
Sa sini nga numero, apat ang kumpirmado nga personnel sang Rural Health Unit kun sa diin isa ang medical technologist, isa ang nurse, kag duha ang midwives.
Magluwas diri, nagpositibo man ang apat ka locally stranded individuals kag lima ka miyembro sang pamilya.
Sa interview sang Bombo Radyo kay Alimodian Mayor Geefre “Calay” Alonsabe, iya ginpahayag nga nagpaninguha man kuntani ang banwa agud malikawan ang virus.
Sa subong, nagabululigay ang mga local government officials kag medical personnel agud mapatigayon ang contact tracing kag malikawan ang transmission.
Nag-apelar ang alkalde sa mga pumuluyo nga indi magpanic kag padayon nga magsunod sa quarantine protocols.
