ILOILO – Nakabulig sa pagpreserba sang natural habitat sang Pawikan ang ginapatuman nga Enhanced Community Quarantine.
Sa Good Morning Philippines program, ginpahayag ni Hananiah Sollesta-Pitogo sang FishWorld Museum and Visitor Center sang Bureau of Fisheries and Aquatic Resources 6, nga ginakabig na nga endangered species ang Pawikan nga may yara sang life span nga 100 ka tuig.
Suno kay Pitogo, may yara sang pito ka species sang Pawikan sa bug-os nga kalibutan kag diri sa Pilipinas, makita ang lima ka species sang nasambit nga aquatic animal.
Apisar sang negatibo nga epekto sang ginapatuman nga lockdown, may maayo naman ini nga epekto para sa mga Pawikan bangud nga temporaryo nga ginpauntat ang fishing activities.
Bilang adbokasiya sang gobyerno sa pagpreserba sang Pawikan kag iban pa nga endangered aquatic animals, ginpahayag ni Pitogo nga may yara sila sang rescue, rehabilitation kag assessment agud nga maproteksyunan kag mapreserba ang nasambit nga mga sapat lakip na ang ila natural habitat.
Sa tion nga may yara sang makasampay nga nga Pawikan, ginpahayag sang natungdan nga ini ang gina turn-over sa Bureau of Fisheries and Aquatic Resources, ginabulong kag ginapaidalom sa assesment antes ibalik sa natural habitat.
Kun patay na sang masapwan ang Pawikan, ang lawas sini ang ginapreserba sa museum sang ahensya.
