Ipaidalom sa Enhanced Community Quarantne (ECQ) ang National Capital Region kag mga kaiping sini nga lugar bangud sa padayon nga pagtimbuok sang COVID-19 cases.
Suno kay Presidential Spokesperson Atty. Harry Roque, ang NCR, Bulacan, Cavite, Laguna, kag Rizal — nga amo ang ginakabig nga “National Capital Region Plus” ang ipaidalom sa ECQ umpisa Marso 29 tubtob Abril 4.
Samtang ang mga essential kag priority construction projects ang pahanugutan sa idalom sang guidelines nga i-issue sang Department of Public Works and Highways.
Ginpahayag ni Roque nga ang tanan nga mass gatherings lakip na ang religious gatherings nga sadto anay ginpahanugutan tubtob sa 10% nga kapasidad ang dumilian na subong.
Ang mga menor de edad, senior citizens, pregnant women kag ang may mga immunodeficiency kag co-morbidities ang ginadumilian man nga magguwa.
Ang curfew suno sa spokesperson ang extended humalin las 6 sa gab-i tubtob las 5 sang aga.
Indi naman sakop sang curfew ang mga authorized persons outside of residence (APOR), mga empleyado, cargo vehicles kag public transportation apang kinahanglan magpakita sang identification cards sa mga otoridad.
Tanan nga dine-in kag al-fresco ang wala man ginapahanugutan magluwas lang sa take out kag delivery.
Una na nga ginpaidalom sa general community quarantine ang NCR Plus nga nag-umpisa sang Marso 22.
