Natalana nga i-release sang English singer-songwriter nga si Ed Sheeran ang iya ika-anum nga studio album nga “-” (Subtract) sa Mayo 5.
Madugay nga ginplano ini nga album nga amo ang katapusan sa iya “mathematical era” nga nag-umpisa sa + (Plus) sang 2011, x (Multiply) sang 2014, (Divide) sang 2017, “No. 6 Collaborations Project” sang 2019, kag = (Equals) sang 2021.
Ginbuyagyag sang singer nga isa ka dekada niya nga gin-trabaho ang amo nga album, apang gin-rewrite sang Pebrero bangud sa sari-sari nga emosyon kaangay sang depression, anxiety, kag kahadlok bangud sa mga pagtilaw sa iya nga kabuhi.
Lakip diri amo ang pagkatukib nga may tumor ang iya nagabusong nga asawa; pagkapatay sang iya best friend nga si Jamal Edwards; kag ang pagbalik-balik sa korte bangud sa kaso nga plagiarism matapos gin-akusahan nga may ginkopyahan ini sa iya hit song nga Shape of You.
“I just wrote whatever tumbled out. And in just over a week, I replaced a decade’s worth of work with my deepest darkest thoughts,” pahayag sini sa isa ka Instagram post.
Kilala si Ed Sheeran nga may apat ka Grammys lakip na ang Song of the Year kag Best Pop Solo Performance sa iya hit nga Thinking Out Loud sang 2016.
Nadag-an man sini ang Best Pop Solo Performance sa iya kanta nga “Shape of You” sang 2018 kag Best Pop Vocal Album sa iya ikatatlo nga album. ##
