Gin-updan sang British singer nga si Ed Sheeran ang iya “best friend” nga si Taylor Swift sa ulihi nga parte sang iya nga European leg sang Eras Tour sa Wembley Stadium sa London.
Sa atubang sang 92,000 fans, perfect ang mash-up performance sang duha ka superstars sa duha ka kanta nga magkaupod nila nga ginhimo— ang 2012 hit nga Everything Has Changed kag 2017 collaboration nga End Game.
Sunod man nga nag-upod si Swift sa pagkanta sang mega-ballad ni Sheeran nga Thinking Out Loud.
Todo-dayaw man si Swift sa English star kasunod sang ila treat sa fans: “This is one of my best friends in the world.. He works so hard, he’s on tour right now and he’s probably so tired but he wanted to come and play for you,” pahayag sini kag nagsaludo pa.
Ini nga concert amo ang una nga performance sang 34-anyos nga American music icon matapos ginkanselar ang iya tatlo ka shows sa Vienna sang nagligad nga semana bangud sa ginalegar planado nga terror attack sa Austria.
Ini man ang iya una nga bes nga pagkanta sa United Kingdom halin sang napatay ang tatlo ka kabataan sa isa ka stabbing incident sa Swift-themed dance class sa Southport, Merseyside.
Wala na gin-mensyonar sang multi-awarded music star ang amo nga mga insidente samtang yara siya sa entablado apang halangpon nga pribado ang iya pagpakig-angot sa mga pamilya sang biktima.
Sa iya concert, gin-treat sini ang fans sa masobra 40 ka hit songs nga naglawig sang masobra tatlo ka oras lakip na ang Cruel Summer, Blank Space, Style, Anti-Hero, Lavender Haze, I Can Do It With A Broken Heart, All Too Well, Look What You Made Me Do, Karma, Shake It Off kag madamo nga iban pa.
Sa sini nga performance, 16 ka beses man ini nga nag-ilis sang iya costume.
Antes sa iya Wembley run, naka-perform man si Taylor sa Edinburgh, Liverpool, Cardiff kag Dublin bilang kabahin sang iya UK kag Ireland leg.
Ini nga Eras Tour— nga magatakop na antes matapos ang 2024 — ang nakalibot na sa nagkalain-lain nga parte sang kalibutan. Nagsugod ini sa Glendale, Arizona sang Marso sang 2023 kag naglawig sang anum ka bulan sa US antes gindala sa Mexico, Argentina kag Brazil.
Sini nga 2024, may shows man ini sa Japan, Australia kag Singapore antes ginsuguran ang European leg sa France sang Mayo. Pagkatapos sini, natalana nga magbalik si Taylor sa tour sa US kag Canada.
