Isa ang Archdiocese of Jaro sa 86 ka mga diocese kag archdiocese sa bilog nga Pilipinas nga magapatigayon sang pagpangamuyo kag prusisyon kadungan sang ika-40 nga anibersaryo sang EDSA People Power Revolution sa Miyerkules, Pebrero 25.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center (JASAC), iya ginpahayag nga diri sa Iloilo, gin-organisar ini sa pagpanguna sang Commission on Laity nga ginabuylugan sang nagkalain-lain nga religious organizations kag mandated organizations.
Sandig sa schedule sang simbahan, alas dos sa hapon sa amo nga adlaw, magatipon ang mga katapo sang Commission on Laity kag nagkalain-lain nga mga parokya para sa Novena sa St. Clement’s Church.
Halin sa amo nga simbahan, patigayunon ang prusisyon padulong sa Jaro Cathedral kaupod ang duha ka imahen nga amo ang imahen sang Mahal nga Birhen sang Guadalupe kag imahen sang Mahal nga Birhen sang Fatima.
Samtang padayon ang prusisyon, maga-pangamuyo ang tanan sang Santos nga Rosaryo.
Alas kwatro sa hapon naman ang Santos nga Misa sa Jaro Metropolitan Cathedral nga pangunahan ni Jaro Archbishop Most Reverend Midyphil B. Billones, D.D. kaupod ang iban nga kaparian.
Pagkatapos sang misa, may patigayunon nga candle-lighting nga amo ang pagtakop sang mobilisasyon sa amo nga adlaw.
“This will be a prayerful expression of our righteous anger sa makahuluya kag makaulugot nga pagpangurakot sa aton nga pungsod,” suno sa JASAC director. Ginmensyonar man sini ang political dynasty nga lakip man sa ila ipanawagan nga tapnaon bangud ginakabig man ini nga ugat sang kurapsyon.
Matandaan nga may duha na ka hugnat sang Trillion Peso March nga natabo sang Septyembre 21 kag Nobyembre 30, 2025, apang ini nga mobilisasyon suno kay Msgr. Oso amo ang “very prayerful” nga akto nga may yara sang misa kag prusisyon sa baylo sang nakaandan nga martsa.
Ginkumpirma man sang Kahublagan Kontra Kurapsyon (KKK) nga maga-upod ini sa Simbahan sa amo nga aktibidad sa Pebrero 25.
Sa schedule sang KKK ukon ang multi-sectoral alliance sang mga Ilonggo batok sa kurapsyon, magatipon ang nagkalain-lain nga cause-oriented groups kag protesters sa Iloilo Provincial Capitol 12:30 sang hapon kag pagasundan sang mga ambahanon kag mga speech.
Sunod sila nga magatabo sa St. Clement’s Church para sa Procession of Faith.
Pareho nga ginapangabay sang KKK kag sang Archdiocese of Jaro ang pagsuksok sang puti nga panapton sa amo nga adlaw.
Tuigan nga ginakomemorar sa Pilipinas ang 1986 EDSA People Power Revolution nga amo ang nagtapos sang diktadurya ni anay Presidente Ferdinand Marcos Sr., ang amay ni President Ferdinand “Bongbong” Marcos, Jr.#
