Ginpasalig sang veteran host-actor nga si Edu Manzano nga indi pagpalagyuhan sang iya anak nga si Luis Manzano ang complaint nga ginpasaka batok sa iya.
Pebrero 7, 2023 sang nag-isyu sang subpoena ang National Bureau of Investigation batok kay Luis, apang na-reset sang Pebrero 20 ang schedule sa pag-atubang ni Luis sa NBI matapos ini nagpangayo sang extension para sa mga dugang nga dokumento.
Kaangot diri, yara sa 50 ka tawo ang nag-file sang estafa complaint batok kay Luis Manzano kag sa mga kasosyo sini sa isa ka Fuel Petroleum Corporation.
Si Luis amo anay ang chairman of the board sang kumpanya kag amo man anay ang co-owner.
Ang Chief Executive Officer amo si Ildefonso “Bong” Medel nga gina-alegar childhood friend ni Luis kag best man sa iya kasal.
Suno naman sa amay nga Manzano, kumpyansa siya nga malampasan ini sang iya anak, apang indi siya mag-spoonfeed diri sang iya himuon bangud may kaugalingon na ini nga pinsar.
Mas mabudlay pa suno sa iya ang magtinir sa showbiz, gani kun nakaluwas si Luis sa industriya sa sulod na sang malawig nga tinuig, makaluwas man ini sa kaso.
“Sigurado yan, no doubt about it. Yan ang tinuro ng lolo ko sa tatay ko. Tinuro ng tatay ko sa akin at ganyan din ang tinuturo ko sa mga anak ko,” pahayag sang amay.
Sa bahin sang ex-wife ni Edu kag iloy ni Luis nga si Vilma Santos, una na ini nag-apelar nga indi pag-husgahan ang iya nga anak sa tunga sang investment issue bangud maayo ini nga sahi sang tawo. ##
