Nagapati ang Department of Education- Schools of Division of Iloilo nga dako ang mabulig sang programa nga EduCARE agud malikawan ang mga kalakasan sa mga eskwelahan pareho sang natabo sa Tacloban City.

Sa amo nga insidente, tatlo ka estudyante ang patay kag madamo ang pilason sang ginluthang sang duha ka mga suspek nga lunsay menor de edad kag estudyante man sang eskwelahan.

Sa interview sang Bombo Radyo kay Mr. Leonil Salvilla, spokesperson sang DepEd Iloilo, iya ginpahayag nga ang EduCARE isa ka importante nga programa nga nagapabaskog sang paghatag sang proteksyon, pagtatap, kag suporta sa mga learners.

Suno sa iya, katuyuan sang EduCARE nga pasanyugon ang kooperasyon sa tunga sang mga eskwelahan, ginikanan, lokal nga panguluhan, kag iban pa nga ahensya pareho sang Provincial Health Office kag Provincial Social Welfare and Development Office (PSWDO).

Ini agud masiguro ang maabtik nga pagtumod ukon pagsabat sa mga isyu nga may kaangtanan sa mental well-being sang mga estudyante.

Nahibaluan nga ginlunsar ang EduCARE Program sang Marso 2026 nga simbolo sang padayon nga pagtinguha sang division nga mapaayo pa ang learners’ rights and protection, wellness, kag mental health support sa mga public schools.