ILOILO CITY- Dismayado si Iloilo 3rd District Representative Lorenz Defensor sa iban nga kaundan sang State of the Nation Address ni Presidente Rodrigo Duterte.
Sa interview sang Bombo Radyo kay Rep. Defensor, iya ginpahayag nga wala maplastar sang maayo sang presidente ang plano sang gobyerno sa ginapangatubang nga COVID-19 pandemic ilabi na nga ang Pilipinas nalang ang pungsod sa Asya nga wala nakapanubo sang numero sang infected sang virus.
Suno kay Defensor, napaslawan man ang presidente nga iplastar kun ano ang bulig sa mga Locally Stranded Individuals kag sa mga Local Government Units nga nagatatap sa mga ini.
Pahayag pa sang opisyal, kuntani wala man ginlakip sang presidente ang natuhoy sa death penalty bangud indi dapat ini mangin prayoridad sa subong ilabi na nga may ginapangatubang nga krisis ang pungsod.
Ginhatagan naman ni Defensor sang 5 ouf of 10 nga rating ang SONA sang presidente.
May kaangtanan naman sa pagbukas sang Second Regular Session para sa 18th Congress, ginpahayag ni Defensor nga nagalaum siya nga mahatagan sang prayoridad sang kaangay nga mga mamalidha ang stimulus bills sa baylo nga death penalty kag charter change.
Suno pa sa opisyal, mangin ang ginaduso nga pagtukod sang bag-o nga mga departamento ang dapat ipaiway anay kag tutukan nalang ang iban nga prayoridad kaangay sang ikaayong lawas kag edukasyon.
