Nalakip ang bugal sang Pilipinas nga si Efren ‘Bata’ Reyes sa inductees sa ginpatigayon nga inaugural World Billiards Hall of Fame sa Yushan, China.
Nalakip man sa ginpasidunggan sa amo nga seremonya amo ang pinaka-popular nga pangalan sa pool history kaangay sa Chinese snooker star nga si Ding Junhui nga amo ang gin-kilala nga nagpasikat sini nga hampang sa Asia. Yara man ang seven-time world champion nga si Ronnie O’Sullivan kag ang female veteran nga si Allison Fisher.
May yara man sang World Billiards Museum nga ginpakita na sa publiko sa Yushan kasunod sang Hall of Fame inauguration.
Tuman ka daku ini nga pagkilala bangud ang selection process para sa Hall of Fame ang nagalakip sa Nomination Committee kag Evaluation Committee nga ginabug-usan sang representatives halin sa international kag regional snooker organizations.
Ang mga nagpartisipar sa Hall of Fame evaluation amo ang World Confederation of Billiards Sports (WCBS), International Billiards & Snooker Federation (IBSF), World Union of Billiards (UMB), World Professional Billiards and Snooker Association (WPBSA) kag ang World Pool-Billiard Association (WPBA).
Ang 69-anyos nga Filipino billiards icon nga kilala nga “The Magician” ukon “Bata” ang ginbun-ag sa Pampanga kag na-induct man anay sa Billiard Congress of America’s Hall of Fame.
Nagdaog siya sang masobra 100 ka international title — lakip ang tion sa tunga-tunga sang 1999 ka 2004 sang ginkilala siya bilang 9-ball kag 8-ball world champion. Sang 2003, ang nasambit nga pool wizard ang nagpangatlo sa masobra 400 participants sa one-pocket tournament sang Derby City Classic sa Indiana, United States.
Napahayag man sini anay nga indi na sini madumduman kun pila ka beses na ini nga nagpasakop sa Southeast Asian Games apang sandig sa rekord, nakabulsa siya sang pito ka gold medaks, duha ka silver, kag 11 ka bronze sa 10 ka mga edisyon sa English billiards, snooker, carom, pool kag rotation.#
